Հին կահույքի նոր կյանքը
2015-04-02
ՆՈՐՈՒԹՅՈՒՆՆԵՐ
Ի՞նչ կանեիք հին կամ վնասված կահույքի հետ: Դեն նետելը թերևս ամենատարածված պատասխանն է, սակայն Թումոյում առաջին հայացքից անպետք թվացող կահույքը ներկվեց, ծածկույթապատվեց և լիովին վերակարգվեց 16 Թումո պատանիների ջանքերի շնորհիվ:
Փետրվար ամսին ուսանողները հավաքեցին հին կահույք և, թիմերի բաժանվելով, աշխատեցին դրան նոր կյանք հաղորդելու վրա: Արդյունքում հնաոճ բազմոցը վերածվեց Կարմիր գլխարկի թեմատիկայով "հեքիաթաոճի"՝ սիրելի գիրքը վայելելու ամենահարմար կահույքի: Իսկ սովորական աթոռակն այժմ կարելի է օգտագործել թե՛ ամսագրեր տեղադրելու և թե՛ ուղղակի նստելու համար: Ծածկույթապատված «տատիկի» բազմոցն ու դրան սազող «թոռնիկի» աթոռը ոճային և հարմարավետ մթնոլորտ են ստեղծում:
Սանդուղքը կծառայի միաժամանակ նստելու և ամսագրեր պահելու համար: Մի աթոռ ուշադրություն է գրավում նկարած դետալներով, սպիտակի և սևի համադրությամբ: Իսկ մեկ ուրիշը՝ սիրո պատմություն է ներկայացնում:
Դասընթացի ընթացքում պատանիները սովորեցին սկզբնական գաղափարը կոնցեպտի վերածել, իսկ կոնցեպտը՝ իրականության: Սովորական նյութերի օգնությամբ, ինչպիսիք են բուրդը, կպչուն ժապավենը և տոպրակները, պատանիները ստեղծեցին յուրահատուկ կահույք, որը ոչ միայն ներկայանալի է և բազմաֆունկցիոնալ, այլև արվեստի գործ է հանդիսանում:
Դասընթացի արդյունքում ստեղծված կահույքը Թումոյի ինստալյացիոն հատվածին ժամանցի՝ գիրք կարդալու և շփվելու կատարյալ վայրի տեսք է տվել:
Աշխատանքները տեսնելու ու ձեզ դուր եկած օրինակը ընտրելու համար այցելե՛ք մեր ֆեյսբուքյան էջ: