Ամառային ճամբարը մեկնարկում է
2014-06-26
ՆՈՐՈՒԹՅՈՒՆՆԵՐ
Հունիսի 30-ին մեկնարկում է երկար սպասված ամառային ճամբարը: Ինտենսիվ ճամբարը, որին կմասնակցեն 100 պատանի ամբողջ աշխարհից և Հայաստանի տարբեր շրջաններից, չորս շաբաթների ընթացքում ճամբարականներին հնարավորություն կտա՝ ներգրավվելու Թումոյի ուսումնական ծրագրին:
Պատանիները կմասնակցեն մեկ կամ երկու շաբաթ տևողությամբ դասընթացների, որոնց ընթացքում կուսումնասիրեն ռոբոտաշինություն, ծրագրավորում, եռաչափ մոդելավորում, անիմացիա, խաղերի ստեղծում, ստեղծագրություն, երաժշտություն և ֆիլմերի ստեղծում: Մասնակիցներից շատերը Հայաստանի հեռու շրջանների բնակիչներ են, ովքեր տարվա ընթացքում հնարավորություն չունեն հաճախելու Թումո ո՛չ Երևանում, և ո՛չ էլ Դիլիջանում: Նրանք կմասնակցեն Թումո ճամբարին Թումոյի աջակիցների և հովանավորների շնորհիվ:
Բացի կրթական դասընթացներին մասնակցելուց, ճամբարականները նաև կմասնակցեն մի շարք այլ միջոցառումների: Օրվա երկրորդ կեսին կանցկացվեն տարաբնույթ սպորտային հանդիպումներ: Իսկ շաբաթ օրերին կազմակերպվող էքսկուրսիաները պատանիներին հնարավորություն կընձեռնեն՝ հաստատելու նոր ծանոթություններ և անցկանելու լավ ժամանակ: Տեղի կունենան նաև հատուկ ուղևորություններ, որոնց ընթացքում ճամաբարականները կկարողանան նյութեր հավաքել իրենց թվային նախագծերի համար:
Մանրամասն տեղեկություններ կարող եք ստանալ այստեղ: